شبيران چنا

چنا، شبيران: سنڌ جي مشھور اداڪارا شبيران چنا، 15 جنوري 1958ع تي لاڙڪاڻي شھر ۾ پيدا ٿي. سندس پيءَ جو نالو شاهنواز چنو آهي. هن جي تعليم انٽر آهي، جيڪا لاڙڪاڻي ۾ حاصل ڪيائين. هيءَ 32 سال پرائمري استاد رهي، جنهن ۾ ٽي سال لاڙڪاڻي ۾ ۽ 29 سال ڪراچيءَ ۾ نوڪري ڪيائين. فن جي دنيا ۾ 1987ع ۾ آئي. سندس پهريون سولو پلي ’ڇوڏو‘ هو، جنهن جو پروڊيوسر بيدل مسرور هو. هن لڳ ڀڳ 500 ڊرامن ۾ ڪم ڪيو آهي. سندس مشھور ڊرامن ۾: ’سوال‘، ’ڪونج‘، ’ڳاڙهي‘، ’زنجيرون‘، ’پٿر دنيا‘، ’نصيب‘، ’رواج‘، ’قسمت‘، ’روڳ‘ ۽ ٻيا شامل آهن. سندس اداڪاريءَ جو انداز بلڪل منفرد آهي. ڪردار جي ادائگيءَ دوران هيءَ ان ۾ ايتري تہ ٻڏي ويندي آهي، جو ڪٿي بہ مصنوعيت جو گمان نہ ٿيندو آهي. کيس ڪردار ۾ حقيقت جو رنگ ڀرڻ جو ڀرپور ڏانءُ آهي. پوريءَ سنڌ ۾ سندس اداڪاريءَ کي پسند ڪيو وڃي ٿو ۽ ماڻهو کيس اصل نالي بجاءِ ڊرامي واري نالي سان ياد ڪن ٿا. جيئن ’خيران‘، ’مرادان‘ وغيرہ. سندس ڪافي ڊائيلاگ بہ مشھور آهن. جيئن: ”خيران جي سر جو خير هجي“ وغيرہ. شبيران چنا ڪافي فلمن ۾ بہ ڪم ڪيو آهي، جن ۾: ’سنڌو ڪناري‘، ’پوتي ۽ پڳ‘، ’نصيب‘، ’خيران ڌاڙيل‘، ’خيران جو بدلو‘ ۽ ٻيون شامل آهن. هن 2005ع ۾ عمري جي سعادت بہ حاصل ڪئي آهي. سندس مڙس جو نالو محمد حسين آهي، جيڪو پوليس کاتي ۾ ملازم هو. کيس اولاد ۾ پنج نياڻيون: عاليه چنا، ناديه حسين، ساديه حسين، شازيه حسين ۽ تانيه حسين آهن. عاليه چنا پڻ ٽي. وي جي مشھور ۽ ناليواري اداڪار آهي، جيڪا ڪافي ڊرامن ۾ ڪم ڪري چڪي آهي. شبيران چنا کي ٽي پٽ: ’نويد حسين، سجاد حسين ۽ جواد حسين‘ آهن. هن وقت ڪراچيءَ ۾ رهائش پذير آهي.

داخلا ۾ استعمال ٿيل تاريخون

1958.01.15  عيسوي

سنڌ جي مشهور اداڪارا شبيران چنا، 15 جنوري 1958ع تي لاڙڪاڻي شهر ۾ پيدا ٿي.

شخصيتون - ڀاڱي جون ٻِيون داخلائون