هارون چنا

چنا، هارون: ناميارو ليکڪ، شاعر ۽ چترڪار هارون چنو ولد محمد لائق، 10 جون 1948ع تي رستم، ضلعي شڪارپور لڳ ڳوٺ ٽنڊي علي شير ۾ ڄائو. هن پرائمري تعليم پنھنجي ڳوٺ جي اسڪول مان حاصل ڪئي. هـارون چـنـي 1972ع ۾ مـاسـٽـر آف ڊزائـننـگ ۾ فـرسـٽ ڪـلاس فـرسـٽ پـوزيـشـن مـاڻـي ۽ حيـدرآباد ۾ ڊزائينـنگ ٽيچرس ڪورس ۾ بہ سڄيءَ سنڌ ۾ فرسٽ ڪلاس فرسٽ پوزيشن حاصل ڪئي. هارون چنو 1968ع ۾ قاضي احمد هاءِ اسڪول ۾ ڊرائنگ ٽيچر مقرر ٿيو ۽ 9 جون 2008ع تي رٽائر ڪيائين. سندس پسنديدہ موضوع ادب ۽ آرٽ آهن. هن لطيف سائينءَ جي سورمين ۽ سورمن کي واٽر ڪلر، آئل پينٽ، پين ۽ پينسل سان جيڪا سونهن ۽ زندگي بخشي آهي، سا ڪمال جي آهي. سندس تصويرن ۾ سنڌ جي تھذيب جو سدا بھار حسن جهلڪي ٿو. هن 1981ع ۾ سنڌ آرٽسٽس گلڊ پاران پنهنجن فنپارن جي پهرين نمائش ڪرائي. سندس تصويرن جون نمائشون ڪيترن هنڌن تي ٿينديون رهيون آهن. هن شاعري جي ابتدا 1966ع ۾ ڪئي. سندس پهريون شعر ’هي جھان وارا‘ روزاني ’نواءِ سنڌ‘ اخبار جي ٻارن واري صفحي ۾ شايع ٿيو. هن ڪيترو عرصو ’فقير تارڪ‘، ’سمبل چڪوي‘ ۽ ’امرت‘ جهڙن فرضي نالن سان ڪهاڻيون ۽ مضمون بہ لکيا. هن ڪيترن ڪتابن جا ٽائيٽل بہ ڊزائن ڪيا، جن ۾ ’وٺي هر هر جنم وربو‘ ۽ ڪيترن ڪتابن جا ٽائيٽل تعريف لائق آهن. هن جي. ايم. سيد، ذوالفقار علي ڀُٽي، شيخ اياز ۽ علامہ آءِ. آءِ. قاضيءَ سميت ڪيترين عظيم شخصيتن جا پورٽريٽ ٺاهيا آهن. وڏي عرصي کان سنڌي ادبي سنگت جو ڪارڪن رهيو آهي. چڪ ۾ وٽس هڪ وڏي ذاتي لائبرري آهي. سندس ڪجهہ ڪتاب اڻ ڇپيل صورت ۾ موجود آهن.

داخلا ۾ استعمال ٿيل تاريخون

1948.06.10  عيسوي

ناميارو ليکڪ، شاعر ۽ چترڪار هارون چنو ولد محمد لائق، 10 جون 1948ع تي رستم، ضلعي شڪارپور لڳ ڳوٺ ٽنڊي علي شير ۾ ڄائو.

شخصيتون - ڀاڱي جون ٻِيون داخلائون