ڌامراهو، مهراڻ

ڌامراهو، مهراڻ: شاعر مهراڻ ڌامراهي جو اصل نالو مسرت حسين ولد قائم الدين ڌامراهو آهي، سندس جنم 12 سيپٽمبر 1970ع تي تاريخي ڳوٺ ڌامراهه تعلقي لاڙڪاڻي ۾ ٿيو. هن پرائمري ۽ مئٽرڪ ڌامراهه مان، انٽر لاڙڪاڻي مان، ايم. اي شاهه عبداللطيف يونيورسٽي خيرپور مان ڪئي. هن شاعريءَ جي شروعات 1990ع کان ڪئي. اديب ۽ محقق ڊاڪٽر بدر ڌامراهو سندس ادبي رهنما رهيو. مهراڻ ڌامراهي جي شاعري سنڌي رسالن توڙي اخبارن ۾ شايع ٿيندي رهي ٿي، سندس گيت ۽ غزل سنڌ جي ناليوارن فنڪارن توڙي فنڪارائن شهلا گل، زاهد گل، سليم رضا، عاشق نظاماڻي، نظير سمي ۽ ٻين ڳائي خوب داد حاصل ڪيو آهي. سندس مشهور گيت ’اوهان ڇا پيار مان ڄاڻو‘ فنڪار سليم رضا ڪنڀر جي آواز ۾ سنڌي سيٽلائيٽ چئنل ڪشش ۽ ڪي. ٽي. اين تان تمام گھڻي مقبوليت ماڻي. انکانسواءِ سندس ٻيا ڪيترائي گيت ريڊيو توڙي سنڌي ٽي وي چئنلن تان نشر ٿيندا رهن ٿا. مهراڻ ڌامراهو سنگيت وديا سنگت لاڙڪاڻي جو چيئرمئن ۽ سنڌي ادبي سنگت شاخ لاڙڪاڻي جو سرگرم ميمبر آهي. کيس دنيا جي مختلف ملڪن جا سڪا ۽ نوٽ گڏ ڪرڻ جو بيحد شوق آهي، وٽس ڪيترن ملڪن توڙي سنڌ جي قديم سڪن جو تعداد ٽي سؤ کان وڌيڪ آهي. سندس شاعريءَ جا ٻه ڪتاب: (1) ’روز ملجي ڪٿي‘ ۽ (2) ’اندر جي آس‘ شايع ٿيل آهن، کيس مڃتا طور ڪي ٽي اين طرفان اوارڊ ۽ ٻيا اعزاز ملي چڪا آهن. هي سوئي سدرن گئس ڪارپوريشن جو ملازم آهي.

داخلا ۾ استعمال ٿيل تاريخون

1970.09.12  عيسوي

شاعر مهراڻ ڌامراهي جو اصل نالو مسرت حسين ولد قائم الدين ڌامراهو آهي، سندس جنم 12 سيپٽمبر 1970ع تي تاريخي ڳوٺ ڌامراهه تعلقي لاڙڪاڻي ۾ ٿيو.

شاعر - ڀاڱي جون ٻِيون داخلائون