ڏاهري، ﷲ ڏنو: نامور سماجي ڪارڪن ﷲ ڏني ولد اميد علي ڏاهريءَ، 1920ع ۾ ڳوٺ صوڀي ڏاهري، تعلقي دولتپور، ضلعي نوابشاھہ ۾ جنم ورتو. ننڍپڻ ۾ والد جي وفات سبب چاچي جي هٿ هيٺ سندس پرورش ٿي. قرآن مجيد جي تعليم پنھنجي ڳوٺ ۾ مفتي محمد دائود ٻگهيي کان حاصل ڪيائين. ڪنهن بہ اسڪول ۾ داخل ٿيڻ کانسواءِ خانگي طريقي سان سنڌي لکڻ پڙهڻ سکيو. سماجي معاملن ۾ تمام گهڻو سرگرم رهندو هو، ننڍا وڏا مسئلا راڄوڻي طريقي سان حل ڪري ماڻهن کي تڪرارن کان بچائيندو هو. کيس روينيو ۽ ايريگيشن جي معاملن ۾ مهارت حاصل هئي. انهن کاتن جا آفيسر بہ کانئس مشورا وٺندا هئا. هي پرهيزگار ۽ متقي شخص هو. 1972ع ۾ حج ڪيائين. 1986ع ۾ پنھنجي ڳوٺ جي ڊٺل مسجد تعمير ڪرايائين ۽ ڳوٺ ۾ ’مدرسہ عربيه محمديه‘ نالي ديني درسگاھہ قائم ڪيائين، جتي اڄ تائين ڪيترا طالب علم تعليم پرائي رهيا آهن. ﷲ ڏتو ڏاهري، درگاھہ ٺلاھہ جي پير مٺل جو مريد هو. ڪيترا ديني جلسا ڪرايائين. حاجي ﷲ ڏني ڏاهريءَ، 13 جون 1990ع تي وفات ڪئي. کيس وصيت موجب پنھنجي ٺهرايل مسجد جي ڀرسان دفن ڪيو ويو.