ڊاڪٽر ڦلو مل ’سُندر‘ ميگهواڙ

ڦُلو مل ميگھواڙ، ڊاڪٽر: محقق، ليکڪ ۽ تعليمي ماهر ڊاڪٽر ڦلو مل ’سُندر‘ ميگهواڙ جو جنم عمرڪوٽ شھر ۾، 3 نومبر 1982ع تي خاڪو ميگهواڙ جي گهر ۾ ٿيو. بعد ۾ سندس خاندان عمرڪوٽ ضلعي جي ڳوٺ غلام نبي شاهه ۾ لڏي آيو، جتي ڦُلوءَ ابتدائي ثانوي ۽ اعليٰ ثانوي تعليم حاصل ڪئي. ڪراچي يونيورسٽيءَ جي سنڌي شعبي مان گريجوئيشن ۽ ماسٽرس ڪرڻ کانپوءِ وفاقي اردو يونيورسٽيءَ جي سنڌي شعبي مان پروفيسر ڊاڪٽر ڪمال ڄامڙي جي نگرانيءَ هيٺ، ’ڍاٽڪي ٻولي، ڍاٽڪي لوڪ ادب، سماجي، ثقافتي ۽ لسانياتي اڀياس‘ جي عنوان تي پي ايڇ. ڊي جي ڊگري حاصل ڪئي. هن سنڌ اڀياس اڪيڊمي (زيبسٽ) ڪراچيءَ ۾ 2012ع کان 2015ع تائين ريسرچ ائسوسيئيٽ/ليڪچرر طور ڪم ڪيو. ان کان علاوه شاهه لطيف چيئر ڪراچي يونيورسٽيءَ پاران شاهه لطيف انسائيڪلو واري رٿا ۾ ريسرچ آفيسر طور خدمتون انجام ڏنيون. هو شاگردي واري دؤر کان لطيفيات ۽ ٻوليءَ جي موضوعن تي تحقيقي مقالا لکڻ سميت سنڌ جي مختلف شھرن ۾ سنڌي ادب ۽ ٻوليءَ تي ٿيندڙ قومي ۽ بين الاقوامي ڪانفرنسن ۾ تحقيقي مقالا پڙهندو رهيو آهي، جيڪي مُختلف تحقيقي جرنلن ۾ پڻ شايع ٿي چُڪا آهن.
سندس ڇپيل ڪتابن ۾: (1) ’نوري، ناري ۽ عدم‘ (ثقافت کاتو حڪومت سنڌ: 2017ع)، (2) ’سنڌي پھاڪا- لسانياتي ۽ سماجي، ثقافتي اڀياس‘ (ترجمو: سنڌي لئنگئيج اٿارٽي 2017ع)، ’شمس العلماء مرزا قليچ بيگ انٽرنيشنل ڪانفرنس جا مقالا‘ (’مرزا قليچ بيگ چيئر‘ 2009ع) وغيره شامل آهن. ڦلو ميگهواڙ ڪراچيءَ جي سچل ڳوٺ ۾ يونيورسٽيءَ سطح جي سنڌي شاگردن لاءِ ’سچل هاسٽل‘ ۽ پرائمري، مڊل، سيڪنڊري ۽ هاير سيڪنڊري اسڪول جي شاگردن ۽ شاگردياڻين لاءِ ’شاھه لطيف ۽ سامي‘ هاسٽل جو بُنياد رکيو آهي. ڊاڪٽر ڦلو مل هن وقت شھيد بينظير ڀٽو يونيورسٽي شھيد بينظيرآباد ۾ اسسٽنٽ پروفيسر طور ڪم ڪري رهيو آهي.

داخلا ۾ استعمال ٿيل تاريخون

1982.11.03  عيسوي

محقق، ليکڪ ۽ تعليمي ماهر ڊاڪٽر ڦلو مل ’سُندر‘ ميگهواڙ جو جنم عمرڪوٽ شھر ۾، 3 نومبر 1982ع تي خاڪو ميگهواڙ جي گهر ۾ ٿيو.

شخصيتون - ڀاڱي جون ٻِيون داخلائون