کيئلداس فاني: سنڌ جي برک شاعر ۽ ڪھاڻيڪار کيئلداس فاني ولد وليرام بيگواڻيءَ جو جنم 4 اپريل 1914ع تي ميان جي ڳوٺ شڪارپور ۾ ٿيو. مئٽرڪ جو امتحان پاس ڪري، شڪارپور جي مشھور نيو ايرا هاءِ اسڪول ۾ استاد طور مقرر ٿيو. گريجوئيشن ڪرڻ کان پوءِ سي. اينڊ ايس ڪاليج شڪارپور ۾ سنڌيءَ جو ليڪچرار مقرر ٿيو. جتي شيخ اياز به وٽس پڙهيو. فاني پنھنجي محنت ۽ قابليت سبب ٿوري ئي وقت ۾ گهڻو مشھور ٿيو. شاعريءَ ۾ آغا صوفيءَ کان رهنمائي حاصل ڪري، سندس قائم ڪيل ’بزم مشاعره‘ جي طرحي مشاعرن ۾ حصو وٺندو هو. شاعريءَ ۾ سندس تخلص ’فاني‘ هو. هو فاني ڪھاڻيڪار به هو. هن ٻاهرئين ادب مان ڪيتريون ڪھاڻيون سنڌيءَ ۾ ترجمو پڻ ڪيون، جيڪي ’سنڌو‘ رسالي ۾ ڇپيون، ساڳئي دؤر ۾ سندس ڪيتريون ئي طبعزاد ڪھاڻيون سنڌوءَ جي مختلف پرچن ۾ ڇپيون.
فانيءَ جي ٻولي سادي، سلوڻي ۽ روانيءَ سان ڀرپور آهي. ڪھاڻين جي چونڊ سماج مان ٿيل آهي. کيئلداس ’فاني‘ جتي ڪلاسيڪل صنفن بيت، گيت ۽ ڪافيءَ ۾ نون خيالن ۽ جذبن کي پيش ڪرڻ ۾ مھارت ملي ٿي، اتي وٽس عروضي صنفن، غزل، نظم، مسدس، مربع، چوسٽي ۽ رباعي جو به نرالو انداز، پختگي ۽ انفراديت آهي. ورهاڱي کان پوءِ فاني سنڌ مان لڏي هند ويو، ان بعد شيخ اياز جڏهن سندس شاعري سنڌو رسالي ۾ پڙهي ته مٿس وڏو اثر ٿيو، جنھن جو ذڪر هن پنھنجي ڪتاب ’ڪاڪ ڪڪوريا ڪاپڙي‘ ۾ ڪيو آهي. کيئداس فانيءَ جي شاعريءَ جو ڪليات ’سمنڊ سمايو بوند ۾‘ ڊاڪٽر انور فگار هڪڙي، سنڌي ادبي بورڊ ڄام شوري کان ڇپائي پڌرو ڪيو، جنھن جو مھاڳ شيخ اياز لکيو. هن برک اديب، شاعر، ڪھاڻيڪار ۽ مترجم 8 اپريل 1995ع تي لاڏاڻو ڪيو.
1914.04.04 عيسوي
سنڌ جي برک شاعر ۽ ڪھاڻيڪار کيئلداس فاني ولد وليرام بيگواڻيءَ جو جنم 4 اپريل 1914ع تي ميان جي ڳوٺ شڪارپور ۾ ٿيو.
1995.04.08 عيسوي
کيئلداس فاني 8 اپريل 1995ع تي لاڏاڻو ڪيو.