ڪاڪڙيءَ جو قلعو: ڪاڪڙي هڪ پرڳڻي جو نالو آهي. جيتوڻيڪ، تاريخ ۾ هن پرڳڻي جو ڪو خاص ذڪر نٿو ملي، پر ڪِن روايتن موجب هن پرڳڻي ۾ هڪ قلعو هوندو هو، جنھن کي پڻ ’ڪاڪڙيءَ جو قلعو‘ چيو ويندو هو. قلعي بابت ’تاريخ معصومي‘ ۾ ڪجهہ حوالا موجود آهن، جن مطابق هي قلعو گنبٽ جي ڀرپاسي، سيٺارجا بالا ۽ پير ڪٽپر جي قبرستان جي آسپاس ۾ آهي. پير ڪٽپر جي نالي سان اهو چئي سگهجي ٿو تہ هي اصل ۾ ’گنج شھيدان مرد ڪٽپر‘ جي نالي سان انهن شھيدن جو مقام هوندو هو، جيڪي مغلن سان وڙهندي مارجي ويا، بعد ۾ ان تي پير ڪٽپر جو نالو پئجي ويو هجي. هيءُ قلعو مزاحمت جو اُهڃاڻ بہ رهيو آهي، ڇاڪاڻ جو مغلن سان سھتن-مڱڻيجن جيڪي جنگيون وڙهيون، سي هن قلعي مان ويھي وڙهيون هيون. 1577ع واري جنگ، ساهتيءَ جي تاريخ ۾ وڏي لڙائي چئي سگهجي ٿي، جنھن ۾ سھتن ۽ مڱڻيجن پنھنجا هزارين ڪونڌر قربان ڪيا پر دشمن اڳيان آڻ نہ مڃي. ٺيڪ ٻئي سال 1578ع ۾ مغلن ڌاريجن جي علائقي تي ڪاھہ ڪري انهن جا سوين ڳوٺ برباد ڪري ڇڏيا. هيءُ قلعو هاڻي ماضيءَ جو ورق بڻجي زبون حال ٿي چُڪو آهي