گدا خاصخيلي

گدا خاصخيلي (شاعر): ساهتي پرڳڻي جي مشھور شاعر گدا حسين خاصخيلي 1947ع ڌاري، ڳوٺ سائين بخش خاصخيلي (نوان جتوئي) تعلقي موري، ضلعي نوشھري فيروز ۾ رمز علي فقير خاصخيليءَ جي گهر ۾ جنم ورتو. ڪجهه درجا سنڌي تعليم حاصل ڪرڻ بعد، اسڪول ڇڏي ڏنائين. روزگار جي حوالي سان رازڪو ڌنڌو ڪندو رهيو، سندس والد ’پير فقير‘ جو طالب هو، جنھن جي درگاهه نوان جتوئيءَ لڳ سندن ڳوٺ ۾ آهي. سنڌ جو مشھور عوامي شاعر ’دادن فقير‘ ڪجهه عرصو ’پير فقير‘ جي مئخاني تي اچي رهيو. گدا حسين، دادن فقير جي شاعريءَ کان متاثر ٿي شاعري شروع ڪئي. شاعريءَ جي سکيا سنڌ جي مشھور سگهڙ، اديب ۽ شاعر حافظ محمد بخش خاصخيليءَ کان ورتي.سندس پھريون شعر ڪربلا جي واقعي بابت 1965ع ۾ عبرت اخبار ۾ ڇپيو. 1977ع کان باقاعدي مزاحمتي شاعري شروع ڪئي. هو بنيادي طور نظم جو شاعر هو، پر غزل تي پڻ دسترس هئس. ان کان سواءِ شاعريءَ جي ٻين صنفن ۾ به گهڻو لکيو اٿس. سندس شاعريءَ ۾ مزاحمت جو رنگ نمايان آهي. سندس شاعريءَ جو پھريون مجموعو ’امن جو ترانو‘ 2009ع ۾ ڇپيو، هن 30 سيپٽمبر 2024ع تي نوان جتوئي، تعلقي موري ۾ وفات ڪئي.

شاعر - ڀاڱي جون ٻِيون داخلائون