گلاب چانڊيو

گلاب چانڊيو (اداڪار): پاڪستان ٽيليويزن جي مشھور اداڪار گلاب چانڊئي جو اصل نالو غلام محمد هو. هُو 6 جنوري 1958ع تي ڳوٺ شھمير چانڊئي، ضلعي نوابشاهه (هاڻوڪي شھيد بينظير آباد) ۾ ڄائو. تعليم مڪمل ڪرڻ کانپوءِ 1976ع ۾ هُو ڪراچي ويو، جتي فوڊ ڊپارٽمنٽ ۾ ڪلارڪ طور ڪم ڪيائين، پر 1978ع ۾ نوڪري ڇڏي واپس موٽي نوابشاهه آيو ۽ ڪجهه عرصو سياست ۾ سرگرميءَ سان حصو ورتائين. ان دوران ذوالفقار علي ڀُٽي کي ڦاسيءَ جي سزا ملڻ تي احتجاج ۾ حصو ورتائين، جنھن ڪري کيس جيل به ڀوڳڻو پيو. هن پنھنجي فني سفر جي شروعات 1980ع جي ڏهاڪي ۾ سنڌي ڊرامي ’ٻيو شخص‘ کان ڪئي. ان کانپوءِ ھن ’تلاش‘، ’سام‘، ’جياپو‘، ’مٽيءَ جا ماڻهو‘ ۽ ’غلام گردش‘ ۾ ڪم ڪيو. ان بعد ھن اردو ڊرامن ’زينت‘، ’روش‘، ’نوري ڄام تماچي‘، ’ٽيپو سلطان‘ ۽ ’ساگر ڪا آنسو‘ ۾ پنھنجا فني جوهر ڏيکاريا. ان کان علاوه ھن ٿيٽر ۽ فلمن ۾ به ڪم ڪيو، سندس پھرين فلم ’دشمن‘ هئي. ان کانپوءِ ھن ’محب شيدي‘، ’سرگم‘ ۽ ٻين فلمن ۾ پڻ ڪم ڪري پاڪستان فلم انڊسٽريءَ ۾ وڏو نالو ڪمايو. ھن پنھنجي فني ڪيريئر ۾ ننڍا وڏا سڀ ڪردار ڪيا، پر کيس فني مقبوليت ’مارئي، چاند گرھن‘ ۽ ’بي وفائيان‘ ۾ منفي ڪردار ادا ڪرڻ سان ملي. ھن 300 کان مٿي سنڌي/اردو ڊرامن ۽ ڇھن فلمن ۾ ڪم ڪيو. کيس فني خدمتن جي اعتراف طور 2016ع ۾ صدارتي ايوارڊ ڏنو ويو. هن ٻھ ڀيرا چونڊن ۾ به حصو ورتو. پر ٻئي ڀيرا ڪامياب ٿي نه سگهيو. 2016ع ۾ پاڪستان تحريڪ انصاف ۾ شموليت ڪئي ۽ بيماريءَ جي حالت ۾ به پي. ٽي. آءِ جي مارچ ۾ شريڪ ٿيو. هن 18 جنوري 2019ع تي وفات ڪئي.

داخلا ۾ استعمال ٿيل تاريخون

1958.01.06  عيسوي

پاڪستان ٽيليويزن جي مشھور اداڪار گلاب چانڊئي جو اصل نالو غلام محمد هو. هُو 6 جنوري 1958ع تي ڳوٺ شھمير چانڊئي، ضلعي نوابشاهه (هاڻوڪي شھيد بينظير آباد) ۾ ڄائو.

2019.01.18  عيسوي

ر گلاب چانڊئي 18 جنوري 2019ع تي وفات ڪئي.

شخصيتون - ڀاڱي جون ٻِيون داخلائون