لطف الله بدوي

لطف الله بدوي: لطف الله بدوي 4 جولاءِ 1904ع تي شڪارپور ۾ استاد امام بخش ’خادم‘ جي گهر ۾ پيدا ٿيو، سندس والد پنھنجي وقت جو مشھور اديب ۽ شاعر هو. لطف الله بدوي 1913ع ۾ گورنمينٽ هاءِ اسڪول شڪارپور ۾ داخل ٿيو، جتي انگريزي پڙهڻ لڳو. 21 جنوري 1918ع تي والد جي وفات کان پوءِ تعليم ڇڏي ٽپال کاتي ۾ ٽيليگراف آفيس ۾ ملازمت ڪيائين پر ٿوري وقت کان پوءِ ملازمت ڇڏي ڏنائين. فقير غلام علي ’مسرور‘ جي صحبت ۾ تصوف ۽ ويراڳ واري واٽ وٺي، گيڙو ويس ڍڪي، يڪتارو کڻي سماع جي محفلن ۾ شريڪ ٿي ڪلام ڳائيندو رهيو. پاڻ به ’جوڳي‘ تخلص اختيار ڪري شعر چوڻ لڳو.
مائٽن جي زور ڀرڻ تي وري به تعليم لاءِ ڌيان ڏيئي، 1920ع ۾ جيڪب آباد مان فائينل جو امتحان پاس ڪيائين. ساڳئي سال پرائمري استاد مقرر ٿيو. 1921ع ۾ شڪارپور جي ٽريننگ اسڪول مان استادن جي سکيا وارو ڪورس ڪري، ٺل ۾ استاد مقرر ٿيو. ڪجهه عرصي کان پوءِ ايگريڪلچر ڪاليج لائلپور مان ڊپلوما ڪري ايگريڪلچر ماستر مقرر ٿيو، جتان اردو گشتي استاد مقرر ٿي ويو.1949ع ۾ ميونسپل اسڪولن جو اسسٽنٽ ڊپٽي ايڊيوڪيشن انسپيڪٽر مقرر ٿيو. پنجاب يونيورسٽيءَ مان بي. اي. جي امتحان پاس ڪرڻ کان علاوه ساڳي يونيورسٽيءَ مان فارسي ۽ مشرقي علوم ۾ ’منشي فاضل‘ جي سند به ورتائين. 1950ع ۾ سي. اينڊ ايس ڪاليج ۾ سنڌيءَ جو استاد مقرر ٿيو. 04 جولاءِ 1958ع تي رٽائرڊ ٿيو. رٽائر ٿيڻ کان پوءِ پنھنجو علمي ۽ ادبي ڪم جاري رکيائين. لطف الله بدويءَ جا سنڌي، اردو ۽ فارسيءَ ۾ ڪيترائي ڪتاب لکيل آهن، جن مان ڪجهه هي آهن: ’نغمئه مستانه‘ (شاعري: 1924ع)، ’گيتانجلي‘ (ترجمو: 1925ع)، ’عروس عجم‘ (ناول: 1926ع)، ’دستئه گل‘ (افسانا: 1930ع)، ’سيدنا علي المرتضيٰ‘ (1930ع)، ’رت جا ڳوڙها’ (ترجمو: 1935ع)، ’تذڪره لطفي‘ (پھريون جلد: 1943، ٻيو جلد 1946، ٽيون جلد 1936)، ’تاريخ پاڪ و هند‘ (ترجمو: 1948ع)، ’پاڪستان جي شھريت‘ (1954ع)، ’تاريخ اندلس‘ (بنو اميه: 1955ع)، ’ڪليات خادم‘ (ترتيب: 1956ع)، ’مجاهدين‘ (ناول: 1960ع)، ’چار درويش‘ (1960ع)، ’ڪنڊڙيءَ وارن جو ڪلام‘ (روحل فقير ۽ مراد فقير، ترتيب: 1960ع)، ’جھاندار شاهه آرام دل‘ (1964ع)، ’ديوان صنعت‘ (ترتيب: 1967ع)، ’احسن القصص‘ (1969ع)، ’حيات اقبال‘ (1957ع)، ’جاويد نامه‘ (ترجمو: 1959ع)، ’ارمغان حجاز‘ (ترجمو: 1962ع)، ’اسرار و رموز‘ (ترجمو: 1965ع)، ’ڇا ڪجي چئو، پوءِ اي اقوام مشرق‘ (ترجمو: 1965ع)، ’مسافر‘ (افغانستان جو سير- ترجمو: 1965ع)، ’دودو چنيسر‘ ڊرامو 1957ع، ’هير رانجهو‘، ’انگلينڊ جا شاعر‘ ۽ ’مير بھرام‘ (ڊرامو) شامل آهن.
سندس ڪيترا ئي اڻ ڇپيل ڪتاب به آهن، جيڪي سندس پونئيرن وٽ آهن. لطف الله بدوي 19 نومبر 1968ع تي وفات ڪئي.

داخلا ۾ استعمال ٿيل تاريخون

1904.07.04  عيسوي

لطف الله بدوي 4 جولاءِ 1904ع تي شڪارپور ۾ استاد امام بخش ’خادم‘ جي گهر ۾ پيدا ٿيو.

1968.11.19  عيسوي

لطف الله بدوي 19 نومبر 1968ع تي وفات ڪئي.

اديب - ڀاڱي جون ٻِيون داخلائون