زرداري ڦوٽو خان

ڦوٽو زرداري : مشهور فنڪار ڦوٽو خان ولد شير محمد زرداري 1956ع ڌاري ڳوٺ عالم خان زرداري لڳ سرهاڙي، تعلقي شهدادپور، ضلعي سانگھڙ ۾ پيدا ٿيو، ڦوٽي زرداريءَ جو جنم هڪ غريب گهراڻي ۾ ٿيو. سندس معمولي تعليم هئي. ننڍپڻ کان ئي راڳ سان دلچسپي هئس. مشهور فنڪار مصري فقير کان گھڻو متاثر هو. ڀرپاسي ۾ جنهن به محفل ۾ مصري فقير ايندو هو ته هي ان محفل ۾ وڃي کيس ٻڌندو هو ۽ ان جي ڳايل ڪلامن تي رياض ڪندو هو. اهو ئي سبب هو جو سندس گائڪيءَ تي مصري فقير جو وڏو اثر هو ۽ سندس آواز به ان سان ملندڙ جلندڙ هو. هن راڳ جي باقاعدي تعليم عبد علي فقير کان ورتي. ڦوٽو زرداري هارمونيم تي ڳائيندو هو ۽ سڄي سنڌ ۾ کيس وڏي مقبوليت حاصل رهي. هميشه نين ڌنن تي ڳائيندو هو. ڪڏهن به ڪا ڌن چوري نه ڪيائين. آسا، ڪاموڏ، تلنگ، ڪوهياري، ڀيروي، پهاڙي ۽ راڻي جي راڳڻين تي کيس عبور حاصل هو. هن شاهه عبداللطيف ڀٽائي، مخدوم طالب الموليٰ، سيد مرتضيٰ ڏاڏاهي، پير اعجاز، احمد شاهه، بلها شاهه ۽ ٻين جي شاعري ڳائي مقبوليت حاصل ڪئي. ريڊيو پاڪستان ۽ ٽيليويزن تي سندس ڪيترائي ڪلام رڪارڊ ٿيل آهن، ان کانسواءِ سندس آواز ۾ رڪارڊ ٿيل سوين آڊيو ڪيسيٽون موجود آهن. ڦوٽي خان زرداريءَ 16 مارچ 1996ع تي وفات ڪئي.

داخلا ۾ استعمال ٿيل تاريخون

1996.03.16  عيسوي

ڦوٽي خان زرداريءَ 16 مارچ 1996ع تي وفات ڪئي.

راڳي - ڀاڱي جون ٻِيون داخلائون