ساٽڙيو: هي شڪار جو هڪ اصطلاح آهي. اهو شڪاري جيڪو زمين ۽ جهنگ جي ٻوٽن کي سٽي، شڪار کي ٻاهر ميدان تي ڪڍي ايندو آهي، ان کي ’ساٽڙيو‘ چئبو آهي. سنڌيءَ ۾ ’ساٽڙيو گاٽڙيو‘ اصطلاح به ڪم ايندو آهي، اهو اصل ۾ ساٽڙيو ۽ گاٽڙيو ٻن لفظن جو مجموعو آهي. شڪار وقت ساٽڙيو زمين تي لٺيون هڻي ۽ ٻوٽن کي سٽي، شڪار کي ٻاهر ڪڍندو آهي، جڏهن ته ٻيو همراهه تير ڪمان کڻي پٺيان هلندو هو، جنهن کي گازڙيو چئبو هو، اهو لفظ تبديل ٿي گاجڙيو ۽ گاٽڙيو ٿي ويو آهي. ساٽڙيو چوراڻو اصطلاح پڻ آهي. اهڙو چور جيڪو بنان ڪنهن منصوبه بندي جي ڪٿان وجھ وٺي، سٽ هڻي چوري ڪري ته ان پڻ ساٽڙيو سڏبو آهي.