آمنہ حامد زبيدي: نامور ليکڪا، محقق، مترجم ۽ افسانا نگار، آمنہ زبيدي 25 ڊسمبر 1960ع تي لاڙڪاڻي ۾ الاهي بخش جي گهر ۾ جنم ورتو. سندس والد درس و تدريس سان لاڳاپيل ۽ ادب دوست هو، جنھن ڪري هن جو لاڙو ادب طرف ٿيو. ابتدائي تعليم گورنمنٽ گرلس اسڪول لاڙڪاڻي مان، مئٽرڪ 1978ع ۾ گورنمنٽ هاءِ اسڪول جيڪب آباد مان پاس ڪيائين. هن لکڻ جي شروعات 1974ع ۾ افسانا لکڻ سان ڪئي، سندس پھريون افسانو ’سچو واقعو‘ ماهوار ’اديون‘ ۾ ڇپيو. ان بعد هن جا ڪيترائي افسانا، سنڌي ٻوليءَ جي مشھور رسالن ’نئين زندگي‘، ’سوجهرو‘ ۽ ٻين ۾ ڇپيا. شروع کان وٺي سندس لاڙو تصوف ڏانھن رهيو آهي. شاھہ لطيف جي بيتن جي سولي سنڌيءَ ۾ معنيٰ ۽ تشريح وارو سندس پھريون ڪتاب ’جان جان پسين پاڻ کي‘ 2010ع ۾ ڇپجي پڌرو ٿيو. سندس ٻيو ڪتاب امام غزاليءَ جي ڪتاب ’عجائب صنع ﷲ‘ جو سنڌيءَ ۾ ترجمو آهي، جيڪو 2011ع ۾ ڇپيو. سندس ٽيون ڪتاب سلطان باهوءَ جي ڪلام جو سنڌيءَ ۾ ترجمو آهي، جيڪو ’روحاني تشريح‘ جي نالي سان 2012ع ۾ ڇپجي پڌرو ٿيو. ان کان علاوہ هن محمد موسيٰ ڀُٽي جي ڪِن اردو ڪتابن جا سنڌيءَ ۾ ترجما پڻ ڪيا آهن، جيڪي سلسليوار ’ماهوار بيداريءَ‘ ۾ ڇپيا آهن.
1960.12.25 عيسوي
نامور ليکڪا، محقق، مترجم ۽ افسانا نگار، آمنه زبيدي 25 ڊسمبر 1960ع تي لاڙڪاڻي ۾ الاهي بخش جي گهر ۾ جنم ورتو.