مرزا اسد بيگ مرزا

اسد بيگ ”اسد“ مرزا: مرزا اسد بيگ ”اسد“ ولد مرزا قليچ بيگ 18 سيپٽمبر 1913ع تي ٽنڊي ٺوڙهي، حيدرآباد ۾ ڄائو. هو سٺو شاعر ۽ نثر نويس هو. مرزا اسد بيگ ابتدائي تعليم ميونسپل اسڪول ٽنڊي ٺوڙهي مان حاصل ڪئي. مئٽرڪ گورنمينٽ هاءِ اسڪول حيدرآباد مان پاس ڪئي. 1934 کان سرڪاري نوڪريءَ ۾ لڳو ۽ سنڌ ڪوآپريٽو سوسائٽيءَ ۾ مختلف عهدن تي ڪم ڪندي 1970ع ۾ رٽائر ٿيو. سندس پرورش ”شمس العلماءِ“ مرزا قليچ بيگ جهڙي عظيم پيءُ جي شفقت ۾ ٿي، ان ڪري علم ۽ ادب کيس ورثي ۾ مليو. شاعريءَ ۾ استاد خود سندس والد محترم هو، سندس ڪلام پختو، سادو، رنگين ۽ نمڪين آهي. حمد نعت، منقبت، غزل، نظم، قطعا ۽ ڪافيون چيون اٿس. اسد مرزا ڪيترائي نصابي ڪتاب به لکيا جيڪي بمبئي يونيورسٽيءَ طرفان منظور ٿيل هئا. ان کان سواءِ ڪوآپريٽو ڊراما ۽ ڊائلاگ ۽ ”ديوان قاسم“ جي ترتيب وارا سندس ڪتاب اچي وڃن ٿا. ديوان قاسم سنڌي ادب ۾ خاص اهميت رکي ٿو. ان ڪتاب جي مقدمي کي تمام گهڻي اهميت حاصل آهي. سندس ٻين ڪتابن ۾ ”عجيب جواهر“ ۽ ”ڪلام قليچ“ شآيع ٿيل آهن. هو ماهنامه ”قليچ“ جو ايڊيٽر پڻ رهيو. آگسٽ 1970ع ۾ پاڪستان ٽيليويزن ڪراچي سينٽر جي تمثيلي مشاعري ۾ مرزا اسد بيگ پنهنجي والد مرزا قليچ بيگ جو ڪردار ادا ڪيو جيڪو سڄي سنڌ ۾ تمام گهڻو پسند ڪيو ويو. هن اهڙو ڪردار 31 ڊسمبر 1981ع تي سنڌي ڊرامي جي سئو ساله جشن جي موقعي تي ٿيل تمثيلي مشاعري ۾ پڻ ادا ڪيو هو. مرزا صاحب 1980ع ۽ 1981ع ۾ پهرين ۽ ٻي ڪل پاڪستان اهل قلم ڪانفرنس اسلام آباد ۾ شريڪ ٿيو. 1986ع ۾ کيس پراونشل ايجوڪيشنل ڪائونسل ۾ ميمبر طور کنيو ويو. مرزا اسد بيگ ”اسد“ 10 اپريل 1990ع تي ڪراچيءَ ۾ وفات ڪري ويو.

داخلا ۾ استعمال ٿيل تاريخون

1913.08.18  عيسوي

مرزا اسد بيگ 18 سيپٽمبر 1913ع تي ٽنڊي ٺوڙهي، حيدرآباد ۾ ڄائو

1990.04.10  عيسوي

مرزا اسد بيگ 10 اپريل 1990ع تي ڪرچيءَ ۾ وفات ڪري ويو.

شاعر - ڀاڱي جون ٻِيون داخلائون