جلالاڻي نصير محمد فقير صوفي

جلالاڻي، نصير محمد فقير صوفي: صوفي نصير فقير جلالاڻي 1258ھہ/ 1842ع ڌاري پيدا ٿيو. هڪ روايت آهي تہ هڪڙي ڀيري صوفي صادق شاھہ تجل شريف ويندي واٽ تي جلالاڻين ۾ اچي ٻپهرو ڪيو. پاڻ اتي فرمايائين تہ ”اسان کي هتي گدري جي خوشبو اچي ٿي، هتي هڪڙو ڪامل مرد خدا پيدا ٿيندو جيڪو ولي ﷲ هوندو“. ڪجهہ وقت کان پوءِ صوفي نصير محمد جي ولادت ٿي. هيءُ ننڍپڻ کان وٺي فقيري طبيعت جو مالڪ هو. بعد ۾ جهوڪ شريف جي مشھور صوفي عبدالستار اول جو طالب ٿيو. هن 118 ورهين جي ڄمار ۾ 27 جمادي الثاني 1380ھہ/ 17 ڊسمبر 1960ع تي وفات ڪئي. صوفي نصير فقير جلالاڻي بابت مشھور تذڪري نگار پير علي محمد راشديءَ پنھنجي مشھور تصنيف ’اهي ڏينهن، اهي شينهن‘ ۾ لکيو آهي تہ: ”چهرو مبارڪ ڏسندي ئي ائين محسوس ٿيندو هو گويا اهڙو چهرو نور جي ڪنهن بنيادي مرڪز جو آئينہ دار آهي. ورنه خاڪي انسان جي چهري ۾ اها تجلي اچي ڪا نہ ٿي سگهي“.
صوفي نصير محمد فقير جا عيني قول مشھور آهن، جن مان ڪجهہ هيٺ ڏجن ٿا:
1- فقير اهو آهي، جنهن کي ڏٺي رب ياد پوي.
2- فقير وٽ وڃڻ راحت ۽ دنيادار ماڻهوءَ وٽ وڃڻ ذلت آهي.
3- جنهن دل کي دوست ياد آهي، سا دل آباد آهي.
4- درد دل جو سينگار آهي .

داخلا ۾ استعمال ٿيل تاريخون

1842.00.00  عيسوي

صوفي نصير فقير جلالاڻي 1258هه/ 1842ع ڌاري پيدا ٿيو .

1960.12.17  عيسوي

، نصير محمد فقير 118 ورهين جي ڄمار ۾ 27 جمادي الثاني 1380هه/ 17 ڊسمبر 1960ع تي وفات ڪئي .

شخصيتون - ڀاڱي جون ٻِيون داخلائون