رئيساڻي، غوث بخش

رئيساڻي، غوث بخش: نامور سياستدان. براهوي قبيلي رئيساڻيءَ جو سردار غوث بخش رئيساڻي، 6 سيپٽمبر 1924ع تي ضلعي قلات جي ڪوڪنگ ساراوان علائقي ۾ پيدا ٿيو. سندس والد جو نالو مير اسدالله رئيساڻي هو. هن 1945ع ۾ فوج مان ڪميشن حاصل ڪئي. 1948ع تائين بلوچ ريجمينٽ ۾ خدمتون سرانجام ڏيڻ کانپو ءِ ميجر جي عهدي تان رٽائر ٿيو. 1949ع ۾ والد جي وفات کانپوءِ چيف آف ساراوان مقرر ٿيو. هي علائقو بلوچستان جي ضلعي ڪڇي ۽ مٿاهين قلات تي مشتمل آهي. هي 1956ع ۾ اولهه پاڪستان (ون يونٽ) اسيمبليءَ جو ميمبر چونڊيو ويو. 1970ع جي عام چونڊن ۾ بلوچستان اسيمبليءَ جو ميمبر چونڊيو. 1971ع ۾ هن پاڪستان پيپلز پارٽيءَ ۾ شموليت اختيار ڪئي. 29 ڊسمبر 1971ع کان 2 اپريل 1972ع تائين بلوچستان جي پهرين سول گورنر جي حيثيت ۾ خدمتون سرانجام ڏنائين. مئي 1972ع ۾ خوراڪ ۽ زراعت جو وزير مقرر ٿيو ۽ 1974ع تائين ان عهدي تي ڪم ڪندو رهيو. 1977ع جي عام چونڊن ۾ پيپلز پارٽيءَ جي ٽڪيٽ تان بلوچستان اسيمبليءَ جو ميمبر چونڊيو ويو. 1977ع ۾ مارشل لا لڳڻ کانپوءِ ڪجهه ڏينهن نظربند رهيو. 26 مئي 1987ع تي جڏهن هو ڪوئيٽا وڃي رهيو هو ته پنهنجي محافظن سميت کيس قتل ڪيو ويو.

داخلا ۾ استعمال ٿيل تاريخون

1924.09.06  عيسوي

نامور سياستدان سردار غوث بخش رئيساڻي، 6 سيپٽمبر 1924ع تي ضلعي قلات جي ڪوڪنگ ساراوان علائقي ۾ پيدا ٿيو.

1987.05.26  عيسوي

نامور سياستدان سردار غوث بخش رئيساڻي کي 26 مئي 1987ع تي جڏهن هو ڪوئيٽا وڃي رهيو هو ته پنهنجي محافظن سميت کيس قتل ڪيو ويو.

شخصيتون - ڀاڱي جون ٻِيون داخلائون