پنڊت وجئه لڪشمي

پنڊت وجئه لڪشمي (Pandit, Vijaya Lakshmi): وجئه لڪشميءَ جو جنم 18 آگسٽ 1900ع تي هندستان جي نهرو خاندان ۾ پنڊت موتي لال نهروءَ جي گهر ۾ ٿيو. هوءَ هندستان جي نامور سياستان پنڊت جواهرلال نهروءَ جي ڀيڻ هئي. 1921ع ۾ هُن رنجيت سيتارام پنڊت سان شادي ڪئي، جيڪو 14 جنوري 1944ع تي لاڏاڻو ڪري ويو. هوءَ پهرين هندستاني عورت هئي، جيڪا ڪئبنيٽ جي ميمبر رهي. 1937ع ۾ کيس اُتر پرديش جي صوبائي قانون ساز اسيمبليءَ جو ميمبر چونڊيو ويو. هن مڪاني خودمختيار حڪومت ۽ عام صحت واري وزارت جو قلمدان سنڀاليو. هن 1939ع تائين پبلڪ هيلٿ جي وزارت سنڀالي 1946ع ۾ کيس يو پيءَ جي قانون ساز اسيمبليءَ ۾ چونڊيو ويو. 1947ع ۾ انگريزن کان آزادي ملڻ کان پوءِ هوءَ 1947ع کان 1949ع تائين، 1949ع کان 1951ع تائين سوويت يونين ۾ يونائيٽيڊ اسٽيٽس ۽ ميڪسيڪو ۾ ۽ 1955ع کان 1961ع تائين آئرلينڊ ۾ سفارتڪار جون خدمتون سرانجام ڏيندي رهي. (انهن سالن دوران هوءَ هندستان پاران اقوام متحدہ ۾ برطانيا جي هاءِ ڪمشنر بہ رهي)، 1958ع کان 1961ع تائين اسپين جي سفير رهي. 1946ع ۽ 1968ع جي وچ ۾ هوءَ اقوام متحدہ جي جنرل اسيمبليءَ جي پهرين عورت صدر بہ رهي. هندستان ۾ هوءَ 1962ع کان 1964ع تائين مهاراشٽر صوبي جي گورنر رهي. ان کان پوءِ هوءَ 1964ع کان 1968ع تائين لوڪ سڀا جي ميمبر رهي. اندرا گانڌي جي 1966ع ۾ وزيراعظم چونڊجڻ کان پوءِ وجيه لڪشمي سندس سخت نقاد رهي ۽ سخت اختلافن سبب آخرڪار رٽائر ٿي وئي ۽ باقي ڏهاڙا ديرادون ماٿريءَ ۾ گذاريائين. سندس ڪتابن ۾ (1) The Evolution of India (1958) ۽ (2) The Scope of Happiness: A Peronal Memoir (1979) شامل آهن.
وجئه لڪشمي جو ديهانت ديراندون (ڀارت) ۾ 1 ڊسمبر 1990ع تي ٿيو. سندس ڌيءَ نئن تارا سهگل، مشھور ناول نگار آهي ۽ سندس ڏوهٽي گيتا سهگل صحافت جي پيشي سان تعلق رکي ٿي.

داخلا ۾ استعمال ٿيل تاريخون

1900.08.18  عيسوي

وجئه لڪشميءَ جو جنم 18 آگسٽ 1900ع تي هندستان جي نهرو خاندان ۾ پنڊت موتي لال نهروءَ جي گهر ۾ ٿيو.

1990.12.01  عيسوي

وجئه لڪشمي جو ديهانت ديراندون (ڀارت) ۾ 1 ڊسمبر 1990ع تي ٿيو.

شخصيتون - ڀاڱي جون ٻِيون داخلائون