پونٽنگ، رڪي ٿامس

پونٽنگ، رڪي ٿامس: آسٽريلوي ڪرڪيٽ ٽيم جو ڪپتان ۽ مشھور بئٽسمين رڪي پونٽنگ آسٽريليا جي شھر ليونسٽن ۾ 19 ڊسمبر 1974ع تي جنم ورتو. سندس پيءُ جو نالو گريم (Graeme) ۽ ماءُ جو نالو لورين (Lorraine) آهي. ساڄي هٿ سان بئٽنگ ڪندڙ پونٽنگ، 1995ع ۾ نيوزيلينڊ ۾ کيڏي ويل گرانڊ اينگيولر ڪرڪيٽ ٽورنامينٽ ۾ سائوٿ آفريڪا خلاف پنھنجي بين الاقوامي سطح تي ون ڊي ڪرڪيٽ جي شروعات ڪئي ۽ ساڳئي سال آسٽريليا جي پرٿ گرائونڊ ۾ سريلنڪا خلاف ٽيسٽ مئچ جي شروعات ڪئي. سندس اعليٰ ڪارڪردگيءَ ۽ اڳوڻي ڪپتان اسٽيووا جي رٽائرمينٽ جي اعلان بعد کيس 2002ع ۾ ون ڊي ٽيم جو ڪپتان ۽ 2004ع ۾ ٽيسٽ ٽيم جو ڪپتان مقرر ڪيو ويو. هن 144 ٽيسٽ مئچن ۾55.22 جي شرح سان 11928 رنسون اسڪور ڪيون، جن ۾ 39 سينچريون ۽ 51 ففٽيون شامل آهن. ٽيسٽ مئچن ۾ سندس وڌ کان وڌ اسڪور 257 آهي، جڏهن تہ 345 ون ڊي مئچن ۾ 43.12 جي شرح سان 12895 رنسون ٺاهي چڪو آهي، جنهن ۾ 29 سينچريون ۽ 78 ففٽيون شامل آهن. هڪ ڏينهن واري مئچ ۾ سندس وڏي ۾ وڏي اننگ 164 رنسن تي مشتمل آهي. هن جون 2002ع ۾ ريانا سان شادي ڪئي، جنهن مان کيس هڪ ڌيءُ ايمي چارلوٽ آهي.

داخلا ۾ استعمال ٿيل تاريخون

1974.12.19  عيسوي

آسٽريلوي ڪرڪيٽ ٽيم جو ڪپتان ۽ مشهور بئٽسمين رڪي پونٽنگ آسٽريليا جي شهر ليونسٽن ۾ 19 ڊسمبر 1974ع تي جنم ورتو.

شخصيتون - ڀاڱي جون ٻِيون داخلائون