ٿامس هنٽ مورگن

ٿامس هنٽ، مورگن (Thomas Hunt, Morgan ):1933ع ۾ وراثتي جيوڙي (Chromosome) جينياتي (Genes) جِيوَ جي اصلي هنڌ دريافت ڪرڻ تي نوبل انعام حاصل ڪندڙ ٿامس مورگن 25 سيپٽمبر 1866ع تي ڪينٽڪي شهر، آمريڪا ۾ ڄائو. مورگن ننڍپڻ کان ئي فطرت جي مطالعي ۾ دلچسپي وٺندو هو. ڏهن ورهين جي عمر ۾ هن پکين جا آنا ۽ ڪيترائي آکيرا گڏ ڪري رکيا هئا. هو 1888ع کان ووڊ هول (Wood Hole) ۾ واقع آمريڪي فش ڪميشن ۾ ڪم ڪرڻ لڳو. 1890ع ۾ جان هاپڪنز (John Hopkins) يونيورسٽيءَ مان ڊاڪٽريٽ جي ڊگري حاصل ڪري، ايڊم بروس (Adam Bruce) فيلو شپ تي يورپ هليو ويو. جتي اٽليءَ ۾ بحري حيات جي تجربيگاھہ ۾ تحقيقي ڪم ڪيائين. 1891ع ۾ برنماوار (Brynmawar) ڪاليج ۾ حياتيات جو ايسوسيئيٽ پروفيسر مقرر ٿيو. 1904ع ۾ ڪولمبيا يونيورسٽي نيويارڪ ۾ حيوانيات جو پروفيسر ۽ 1945ع تائين انهيءَ اداري سان لاڳاپيل رهيو. ڪولمبيا يونيورسٽيءَ ۾ پڙهائڻ دوران وراثتي قانون دريافت ڪيائين. انهيءَ تحقيق تي کيس طب جي شعبي ۾ خدمتن جي اعتراف طور 1933ع ۾ نوبل انعام ڏنو ويو. پاڻ 4 ڊسمبر 1945ع تي ڪيليفورنيا ۾ گذاري ويو .

داخلا ۾ استعمال ٿيل تاريخون

1866.09.25  عيسوي

ٿامس مورگن 25 سيپٽمبر 1866ع تي ڪينٽڪي شهر ، آمريڪا ۾ ڄائو .

1945.12.04  عيسوي

ٿامس هنٽ 4 ڊسمبر 1945ع تي ڪيليفورنيا ۾ گذاري ويو .

شخصيتون - ڀاڱي جون ٻِيون داخلائون