حامد ناصرچٺا

چٺا، حامد ناصر: پنجاب جو سياستدان حامد ناصر چٺا 1945ع ڌاري ڳوٺ احمد نگر تعلقي وزير آباد ۾ پيدا ٿيو. ابتدائي تعليم لاهور مان حاصل ڪيائين ۽ گورنمينٽ ڪاليج لاهور مان ايم. اي (سياسيات) جي ڊگري حاصل ڪيائين. 1970ع جي عام چونڊن ۾ پهريون ڀيرو سياست ۾ اچي، صوبائي اسيمبليءَ جي چونڊ وڙهيو، پر ڪامياب نه ٿيو. ٻيهر 1977ع جي چونڊن ۾ بيٺو، پر ڪامياب نه ٿي سگهيو. پاڪستان پيپلز پارٽيءَ جي خلاف قومي اتحاد (پي اين اي) جي تحريڪ ۾ ڀرپور حصو ورتائين. جنرل ضياءالحق جي مارشل لا حڪومت ۾پنجاب جي صوبائي ڪابينه ۾ تعليم کاتي جو وزير ٿيو. 1985ع جي غير جماعتي چونڊن ۾ قومي اسيمبليءَ جو ميمبر منتخب ٿيو. محمد خان جوڻيجي جي ڪابينا ۾ پهرين وزير اطلاعات ۽ نشريات ۽ بعد ۾ قومي اسيمبليءَ جو اسپيڪر منتخب ٿيو. ڊسمبر 1988ع تائين انهيءَ عهدي تي فائز رهيو. 1990ع جي عام چونڊن ۾ ٻيهر قومي اسيمبليءَ جو ميمبر چونڊيو ۽ نوازشريف ڪابينا ۾ وزير بڻيو. ڪجهه عرصي کان پوءِ سندس وزيراعظم سان اختلاف پيدا ٿي پيا. جڏهن مسلم ليگ جو صدر محمد خان جوڻيجو لاڏاڻو ڪري ويو ۽ ميان نوازشريف پاڪستان مسلم ليگ جو نئون صدر منتخب ٿيو ته هن وزارت تان استعيفا ڏني. اپريل 1993ع ۾ جڏهن صدر غلام اسحاق خان، ميان نواز شريف جي حڪومت ۽ اسيمبلي ختم ڪئي ته حامد ناصر چٺا کي نگران حڪومت ۾ وزير مقرر ڪيائين. 9 مئي 1993ع تي پاڪستان مسلم ليگ (جوڻيجو گروپ) جو صدر منتخب ٿيو. 1993ع جي عام چونڊن ۾ هن جو ۽ پيپلز پارٽيءَ جو پاڻ ۾ اتحاد ٿيو ۽ پنجاب ۾ مسلم ليگ (ج) جو وزيراعليٰ مقرر ٿيو. فبروري 1997ع جي عام چونڊن ۾ ڪامياب نه ٿي سگهيو. هن وقت پاڪستان عوامي اتحاد جي مرڪزي رهنمائن ۾ شامل آهي.

داخلا ۾ استعمال ٿيل تاريخون

1993.05.09  عيسوي

9 مئي 1993ع تي پاڪستان مسلم ليگ (جوڻيجو گروپ) جو صدر منتخب ٿيو.

شخصيتون - ڀاڱي جون ٻِيون داخلائون