سومرو محمد اسماعيل منصور

محمد اسماعيل سومرو ’منصور‘: شاعر محمد اسماعيل ولد جند وڏو خان سومرو، پهرين ڊسمبر 1938ع تي ڏهرڪي ضلعي گھوٽڪيءَ ۾ پيدا ٿيو. ابتدائي تعليم گورنمينٽ پرائمري اسڪول ڏهرڪيءَ مان حاصل ڪئي. گورنمينٽ هاءِ اسڪول ميرپور ماٿيلي مان 1956ع ۾ مئٽرڪ ڪيائين. هن 1963ع ۾ ايم. اي سنڌي ڪئي. ان کانسواءِ بي. ايڊ ۽ ايل. ايل. بي جون ڊگريون پڻ حاصل ڪيائين. محمد اسماعيل سومري پيشوراڻي زندگيءَ جي شروعات تعليم کاتي ۾ استاد جي حيثيت سان ڪئي، جتان ترقي ڪري 1969ع ۾ ليڪچرار، 1979ع ۾ اسسٽنٽ پروفيسر ۽ 1989ع ۾ پرنسپال جي اهم عهدي تي رهي رٽائر ڪيائين. هن لکڻ جي شروعات 1961ع ڌاري شاعريءَ کان ڪئي. شاعريءَ ۾ ’منصور‘ تخلص سان غزل، وائي، بيت، نظم، چوسٽي ۽ ٽيڙوءَ تي طبع آزمائي ڪري چڪو آهي. سندس شاعري سنڌ جي ادبي رسالن ۽ اخبارن ۾ ڇپجي چڪي آهي. ادبي حوالي سان لطيف ادبي سنگت جو جنرل سيڪريٽري رهيو. سندس ڇپيل ڪتابن ۾: (1) ’حسن ڪمال رسول الله صلي الله عليه وسلم‘ (قصيده برده شريف جو سنڌيءَ ۾ ترجمو، 2007ع)، (2) ’عين جمال رسول الله صلي الله عليه وسلم‘، (نعتيه شاعري: 2012ع) شامل آهن. کيس ادبي خدمتن عيوض بيدل اوارڊ 2012ع سميت ڪيترا اوارڊ ۽ سرٽيفڪيٽ ملي چڪا آهن.

داخلا ۾ استعمال ٿيل تاريخون

1938.12.01  عيسوي

شاعر محمد اسماعيل ولد جند وڏو خان سومرو، پهرين ڊسمبر 1938ع تي ڏهرڪي ضلعي گھوٽڪيءَ ۾ پيدا ٿيو.

شاعر - ڀاڱي جون ٻِيون داخلائون