سيال، احمد خان: نامياري اديب ۽ تعليمدان احمد خان ولد محراب خان سيال، 15 سيپٽمبر 1930ع تي ڳوٺ گنجا، تعلقي ميهڙ، ضلعي دادوءَ ۾ جنم ورتو. ابتدائي تعليم پرائمري اسڪول ٺوڙها، تعلقي ميهڙ مان ڪئي، مئٽرڪ 1955ع ۾ گورنمينٽ هاءِ اسڪول ميهڙ مان ڪيائين ۽ 1957ع ۾ هاءِ اسڪول ۾ استاد مقرر ٿيو. ان کان سواءِ هاءِ اسڪول ميهڙ جي هاسٽل جو انچارج به ٿي رهيو، جنهن ۾ 100 کان وڌيڪ شاگرد رهندا هئا. احمد خان سيال ڳوٺ ٿرڙي محبت، ٻٽ سرائي، ميهڙ، راڌڻ، ڦلجي اسٽيشن ۽ ڪڪڙ جي اسڪولن ۾ استاديءَ جا فرض پنهنجي قابليت ۽ محنت سان سر انجام ڏنا، نوڪريءَ دوران 1962ع ۾بي. اي، 1964ع ۾ ايم. اي ۽ 1969ع ۾ بي. ٽي پاس ڪيائين. ان دوران آخوند محمد دائود ڀٽي سيتائيءَ کان عربي ۽ فارسيءَ جي به ڄاڻ حاصل ڪيائين. آخوند صاحب جي تمام گهڻي عزت ڪندو هو ۽ کيس سڀني استادن ۾ اعلى حيثيت ڏيندو هو.
احمد خان سيال، جمعه خان ’غريب‘ ۽ رئيس ضياءُ الدين ’بلبل‘ جي صحبت ۾ ادبي ميدان ۾ قدم رکيو. 1952ع کان لکڻ جي شروعات ڪيائين، شاعري ۽ علم عروض جو ڄاڻو هو، پر سندس گھڻو لاڙو نثر نويسيءَ ڏانهن هو، ڪيترن موضوعن تي مضمون ۽ مقالا لکيائين، جيڪي وقت بوقت ماهوار رسالن: ’اديب سنڌ‘، ’نئين زندگي‘ وغيره رسالن ۾ ڇپجندا رهيا. ميهڙ مان جاري ٿيندڙ هفتيوار اخبار ’فيض‘ جو ڪالم نويس به رهيو، جنهن سلسلي ۾ اصلاحي، مزاحيه، طنزيه ۽ تنقيدي ڪالم لکيائين. ادبي ميدان ۾ شمس الدين ’بلبل‘ کان بيحد متاثر هو ۽ ان جي شخصيت جو مٿس گهرو اثر هو. سنڌ سڌار سوسائٽيءَ جي گڏجاڻين توڙي ’جميعت الشعراءَ‘ جي ادبي ڪانفرنسن ۾ حصو وٺندو هو. احمد خان سيال 20 نومبر 1983ع تي وفات ڪري ويو.
1930.09.15 عيسوي
نامياري اديب ۽ تعليمدان احمد خان ولد محراب خان سيال، 15 سيپٽمبر 1930ع تي ڳوٺ گنجا، تعلقي ميهڙ، ضلعي دادوءَ ۾ جنم ورتو.
1983.11.20 عيسوي
احمد خان سيال 20 نومبر 1983ع تي وفات ڪري ويو.