جيلاني: جيلاني ۽ گيلاني، حسني ۽ حسيني سيد آهن. هي سيد حضرت پيران پير شيخ عبدالقادر جيلانيءَ جي اولاد مان آهن ۽ پير سڏجن ٿا. شيخ عبدالقادر جيلانيءَ اسلامي تعليم جيلان (گيلان) مان ورتي، جنهن جي نسبت سان هنن جو اولاد جيلاني ۽ گيلاني سڏجي ٿو. هن جي اولاد مان ڪجهه سنڌ ۾ هجرت ڪري آيا، جن مان راڻيپور وارا جيلاني پير، خيرپور، ڪاماري، گھوٽڪي، قاضي احمد، گاجيلي شريف، نيئنگ، ميرپورخاص، پٻڻ ۽ ٿاڻي بولاخان وغيره وارا جيلاني پير ڳڻي سگهجن ٿا. مشهور سياستدان غلام رسول شاهه، سيد آفتاب شاهه جيلاني، وزيراعليٰ سنڌ، سيد قائم علي شاهه، صالح شاهه ۽ غلام شاهه نيئنگ وارا جيلاني سيدن مان آهن. ڪي وري پنجاب ۾ وڃي ويٺا، جيڪي گيلاني سڏيا ويا. پاڪستان جو موجوده وزيراعظم، سيد يوسف رضا گيلاني به انهن مان آهي.