ڏن: لفظ ڏن جون مختلف محققن مختلف معنائون لکيون آهن. خراج، ڍل، محصول، لاڳو، مريداڻو، ساليانو ۽ ٻنڌاڻ وغيره. ڏن لفظ جي معنيٰ خيرات ۽ دان پڻ آهي. جتي جتي قبيلائي ۽ سرداري نظام رائج آهي، اتي ڪمزور اعتقاد جي گھڻائي ۽ پيري مريديءَ جي ڪري هر ڪو ڪنهن نه ڪنهن جو ڏاني/ ڏن ڀريندڙ/ ڏيندڙ آهي. يعني ڪو پير جو ته ڪو مير جو ڏاني آهي. هي ڏن حاڪم جو عام ماڻهوءَ تي ۽ مرشد جو مريد تي ساليانو ٻڌل هوندو آهي. شاهه سائين پڻ لفظ ’ڏاني‘ کي مختلف بيتن ۾ استعمال ڪيو آهي. ڊاڪٽر نبي بخش خان بلوچ جي ’جامع سنڌي لغات‘، جلد ٻئي (ص: 973) مطابق لفظ ڏن جي معنيٰ خراج، ڍل، محصول، فقير کي ڏنل خيرات، هر سال ڪنهن فقير يا مرشد کي ڏنل ڪجهه پئسن جو انداز، لاڳ وغيره ڄاڻايل آهي.